ሰርተፊኬት የሌላቸው የኮንስትራክሽን ባለሙያዎችን ከስራ የሚያግድ አሰራር ተግባራዊ ሊደረግ ነው

በኮንስትራክሽን ኢንዱስትሪ ውስጥ የሚሰማሩ ባለሙያዎችን ብቃት ለማረጋገጥና የዘርፉን ጥራት ለመጠበቅ የሚያስችል አዲስ አሰራር ተግባራዊ ሊደረግ መሆኑን የከተማና መሰረተ ልማት ሚኒስቴር አስታወቀ።

አዲሱ አሰራር በዘርፉ የሚሳተፉ ባለሙያዎች ከጀማሪ እስከ ከፍተኛ የሙያ ደረጃ ድረስ በአግባቡ ሰልጥነውና ህጋዊ የብቃት ማረጋገጫ (ሰርቲፊኬሽን) ስርዓት ውስጥ አልፈው ወደ ስራ እንዲሰማሩ የሚያስገድድ ነው።

የከተማና መሰረተ ልማት ሚኒስትር ዴኤታ የትምጌታ አስራት (ዶ/ር) እንደገለጹት በዘርፉ የሚስተዋሉ የጥራት ችግሮችን ለመፍታትና የባለሙያዎችን ብቃት ለማረጋገጥ ስልጠና፣ ምዘና እና ሰርቲፊኬሽን በአንድ ላይ የተሳሰረ ስርዓት መዘርጋት ወሳኝ ነው።|

ለዚህም ስራ ስኬታማነት ሚኒስቴሩ ከስራና ክህሎት ሚኒስቴር ጋር በቅንጅት እየሰራ የሚገኝ ሲሆን  የሁለቱ ተቋማት የጋራ ጥረት የቴክኒክና ሙያ ስልጠና ማዕከላትን በመጠቀም የሰርቲፊኬሽን ስርዓቱን ተደራሽ እና ውጤታማ ለማድረግ ያለመ ነው።

ሚኒስትር ዴኤታው አክለውም አሰራሩ ደረጃ በደረጃ ተግባራዊ የሚደረግ መሆኑን ጠቁመው ወደፊት ሰርተፊኬት የሌላቸው ባለሙያዎች በየትኛውም ደረጃ በሚገኙ የኮንስትራክሽን ስራዎች ላይ እንዳይሳተፉ የሚያግድና ሙሉ በሙሉ አስገዳጅ እንደሚሆን አስገንዝበዋል።

ይሁን እንጂ ህጉን ሙሉ በሙሉ አስገዳጅ አድርጎ ወደ ተግባር ከመገባቱ በፊት ለባለሙያዎች ምቹ ሁኔታዎችን የመፍጠርና የቅድመ ሁኔታ ስራዎችን የማጠናቀቅ ስራዎች በትኩረት እየተከናወኑ ይገኛሉ።

ይህ እርምጃ የተወሰደው በኢትዮጵያ የኮንስትራክሽን ዘርፍ እየታየ ያለውን አሳሳቢ የጥራት መጓደል ለመቅረፍ ሲሆን በዋናነት የጥራት መጓደል እና ደረጃ በደረጃ የሚተገበር የመመዘኛ ስርዓት አለመኖር በችግርነት ይጠቀሳሉ።


በተጨማሪም የባለሙያ ብቃት ማረጋገጫ ስርዓት አለመኖር የዘርፉን ስም እና ጥራት የጎዳ ሲሆን  አንድ ባለሙያ ከዩኒቨርሲቲ ተመርቆ ወደ ስራ ከገባ በኋላ በስራ ሂደት ውስጥ የሙያ ብቃቱን የሚለካ ወይም የሚያድስ ስርዓት አለመኖሩም ተጠቃሽ ነው።


በዚህም ምክንያት ብቃት የሌላቸው ሰዎች ሳይመዘኑ "መሐንዲስ" በሚል መጠሪያ ስራ ላይ መሰማራታቸው ለግንባታ ጥራት መጓደል እንደ ዋና ምክንያት ይነሳል።


በሌላ በኩል ልምድ ያላቸውና የበቁ ባለሙያዎች ለተሻለ እድል ወደ ውጭ አገራት  እየተሰደዱ መሆናቸው በዘርፉ ላይ ከፍተኛ ክፍተት የፈጠረ ሲሆን በሀገር ውስጥ የሚቀሩት ባለሙያዎች ከአዳዲስ ቴክኖሎጂዎች ጋር የሚተዋወቁበት ተቋማዊ አሰራር ስለሌለ በዘርፉ አቅም እየገነቡ ከመሄድ ይልቅ እያጠፉ በመማር ሂደት ውስጥ እንዲቆዩ ተገደዋል።


አሁኑ አሰራር አንድ ኮንትራክተር ውል ገብቶ ስራ ከጀመረ በኋላ ግንባታውን በጥራትና በተቀመጠለት ጊዜ መፈፀሙን መቆጣጠር የሚያስችል ጠንካራ ስርዓት ባለመኖሩ የጥራት መጓደል አደጋ ተጋርጦበታል።


ይሁን እንጂ እነዚህን ችግሮች ለመቅረፍ የከተማና መሰረተ ልማት ሚኒስቴር ከስራና ክህሎት ሚኒስቴር ጋር በመተባበር ባለሙያዎች የሚሰለጥኑበት፣ የሚመዘኑበት እና ለሙያ ስነ-ምግባር ጉድለት የሚቀጡበትን አዲስ የብቃት ማረጋገጫ ስርዓት እየዘረጋ ይገኛል።


የሰርቲፊኬሽን ስርዓቱን በአገር አቀፍ ደረጃ አስገዳጅ የማድረግ ሂደቱ ዓመታትን ሊፈጅ የሚችል ቢሆንም በአሁኑ ወቅት ዝግጅቱና የተግባር እንቅስቃሴው በይፋ መጀመሩ ተመላክቷል።