በሳዑዲ አረቢያ በአስቸጋሪ ሁኔታ ውስጥ የሚገኙ ዜጎችን ለመታደግ በተደረገው የዲፕሎማሲ ጥረት 1 ሺህ 971 ኢትዮጵያውያን የንጉሣዊ ምሕረት ተጠቃሚ መሆናቸውን የኢትዮጵያ ፌዴራላዊ ዲሞክራሲያዊ ሪፐብሊክ የውጭ ጉዳይ ሚኒስቴር አስታውቋል።
እነዚህ ዜጎች በሳዑዲ አረቢያ የሕግ ሒደትና የፍርድ ውሳኔ ላይ የነበሩ ሲሆን፤ በአሁኑ ወቅት በተከታታይ በረራዎች ወደ ሀገራቸው እየተመለሱ እንደሚገኙ ሚንስቴሩ ገልጿል።
የውጭ ጉዳይ ሚኒስቴር የቃል አቀባይ ጽሕፈት ቤት እንደገለጸው የኢትዮጵያ መንግሥት በውጭ አገር ለሚኖሩ ዜጎቹ ደኅንነት፣ ጥበቃና የቆንስላ ድጋፍ ከፍተኛ ትኩረት ይሰጣል።
ይህ የሰብዓዊ ምሕረት ጥረትም በሁለቱ አገራት ከፍተኛ አመራሮች መካከል በተደረጉ ተከታታይ የውይይት መድረኮች እና በሪያድ በሚገኘው የኢትዮጵያ ኤምባሲ እንዲሁም በጅዳ በሚገኘው ቆንስላ ጄኔራል አማካኝነት የተገኘ አዎንታዊ ውጤት ነው።
በሳዑዲ አረቢያ የሚገኙ ኢትዮጵያውያንን የሕግ ሒደትና የፍርድ ውሳኔ የተላለፈባቸውን ጉዳዮች በተመለከተ ከመንግሥቱ ባለሥልጣናት ጋር በቅርበት መሥራት የኢትዮጵያ መንግሥት ዋና የትኩረት አቅጣጫ መሆኑን ሚኒስቴሩ በመግለጫው አስምሮበታል።
የሰብዓዊ ምሕረቱ ሂደት በሁለቱ አገራት መካከል ያለውን የረጅም ዘመን የትብብር ግንኙነትና በቆንስላ ጉዳዮች ላይ ያላቸውን ጠንካራ መስተጋብር የሚያሳይ መሆኑንም አክሎ ገልጿል።
የተገኘው የሰብዓዊ ምሕረት ስኬት እንደተጠበቀ ሆኖ በሳዑዲ አረቢያ በአስቸጋሪ ሁኔታ ውስጥ ያሉ ሌሎች ዜጎችን መብትና ደኅንነት ለመጠበቅ የሚደረገው የዲፕሎማሲ ጥረት ተጠናክሮ እንደሚቀጥል ሚኒስቴሩ አረጋግጧል።
በውጭ አገር የሚኖሩ ዜጎችን ጥቅም ለማስጠበቅ ያሉትን የዲፕሎማሲና የቆንስላ አማራጮች ሁሉ በአግባቡ በመጠቀም በቀሪ ጉዳዮች ላይም ከሳዑዲ አረቢያ መንግሥት ጋር ያለውን ግንኙነት አጠናክሮ በመቀጠል ዘላቂ መፍትሔ ለማምጣት እንደሚሠራም አስታውቋል።
የኢትዮጵያ የውጭ ጉዳይ ሚኒስትር ዶ/ር ጌዲዮን ጢሞቴዎስ ከሳዑዲ አረቢያ የኢትዮጵያ አምባሳደር አብደላ ቢን ሀሰን አል-ዛህራኒ ጋር ሐምሌ 1 ቀን 2018 ዓ.ም በአዲስ አበባ መወያየታቸው ይታወሳል።
በዘንድሮው ዓመት መጀመሪያ ላይ በአደንዛዥ ዕፅ ወንጀል የተከሰሱ ሰባት ኢትዮጵያውያን በሳዑዲ አረቢያ መገደላቸው ለሁለቱ አገራት ግንኙነት ፈታኝ ወቅት እንደነበር ይታወቃል።
ይሁን እንጂ የኢትዮጵያ መንግሥት በዲፕሎማሲያዊ መንገድ ባደረገው ተከታታይ ድርድር፤ 343 ኢትዮጵያውያን እስረኞች በንጉሣዊ ምሕረት እንዲለቀቁ ማስቻሉ ይታወሳል።
የአምነስቲ ኢንተርናሽናል መረጃ እንደሚያመለክተው በሳዑዲ አረቢያ በሚገኘው የኻሚስ ሙሸይት እስር ቤት የሚገኙ ቢያንስ 63 ኢትዮጵያውያን አሁንም የሞት ቅጣት አደጋ ተጋርጦባቸው እንደሚገኙ ገልጾ ነበር።
ይሁን እንጂ አሁን መንግሥት ይህንን የዜጎች የመመለስ ሒደት በበላይነት እየተከታተለ ሲሆን ለተመላሾቹ አስፈላጊውን ድጋፍ በማድረግ ወደ ማኅበረሰቡ የመቀላቀል ስራዎች እያከናወነ መሆኑን አስታውቋል።
ይህ ዓይነቱ የዲፕሎማሲ ስኬት በሳዑዲ አረቢያ ለሚገኙ ሌሎች ኢትዮጵያውያን መፍትሔ ለማግኘት እንደ ምሳሌ የሚወሰድና ወደፊት ለሚከናወኑ ተመሳሳይ ተግባራት መነሳሻ እንደሚሆን ይጠበቃል።
