ግዙፉ የነዳጅ አቅራቢ ኢኖክ ለኢትዮጵያ ነዳጅ ለማቅረብ ዝግጅቱን አጠናቀቀ

ግዙፉ የተባበሩት አረብ ኤምሬትስ የነዳጅ ዘይትና ጋዝ አቅራቢ ኩባንያ ኤሚሬትስ ናሽናል ኦይል ካምፓኒ (ENOC) የፔትሮሊየም ምርቶችን ለኢትዮጵያ ገበያ በስፋት ለማቅረብ የሚያስችለውን የመጨረሻ ዝግጅት እያጠናቀቀ መሆኑን አስታውቋል።

የጅቡቲ የኢነርጂ እና የተፈጥሮ ሀብት ሚኒስትሩ ዶ/ር ጃማ መሀመድ ሀሰን፣ የኢኖክ ዋና ስራ አስፈጻሚ እና የኤች.ዲ.ቲ.ኤል የቦርድ ሰብሳቢ ከሆኑት አቶ ሁሴን ሱልጣን ሉታ ጋር በጅቡቲ ቢሮአቸው በኤነርጂያ ፓርክ ተወያይተዋል።


የአቶ ሁሴን ሱልጣን ሉታ የጅቡቲ ጉብኝት አዲሱን የኢነርጂ ሚኒስትር ለመተዋወቅ እና የሁለቱን ወገኖች የትብብር ግንኙነት ለማጠናከር ያለመ የክብር ጉብኝት መሆኑ ተገልጿል።

በውይይቱ ላይ የኤች.ቲ.ኤል (HTL) ዋና ስራ አስፈጻሚ አቶ ፋሃድ አብዱልራህማን አስካር፣ የኤች.ዲ.ቲ.ኤል (HDTL) ዋና ስራ አስኪያጅ አቶ ኦማር ካሱ እንዲሁም ከሚኒስቴሩ እና ከጅቡቲ አለም አቀፍ የሃይድሮካርቦን ማህበር የተውጣጡ የስራ ኃላፊዎች ተገኝተዋል።

በውይይቱ ወቅት የዶራሌህ ነዳጅ ማከማቻ ተርሚናል ለኢትዮጵያ ገበያ እያቀረበ ያለው የነዳጅ ምርት አቅርቦት አፈጻጸም አበረታች መሆኑ ተነስቷል።


በዚህም ሁለቱ ወገኖች በተለይም ወደ ኢትዮጵያ የሚላኩ የነዳጅ ምርቶች አቅርቦትን ለማቀላጠፍ እና በቅርቡ በጅቡቲ እየተከናወኑ ያሉ የኢነርጂ መሰረተ ልማት ፕሮጀክቶችን ለማፋጠን መግባባት ላይ ደርሰዋል።


በሌላ በኩል በጅቡቲ የሚከናወኑት ስትራቴጂያዊ የኢነርጂ ፕሮጀክቶች ቅድሚያ የተሰጣቸው ሲሆን ከነዚህም መካከል የባቡር መስመርን ከነዳጅ ማከማቻ ጣቢያዎች ጋር የማገናኘት ስራ፣ ተጨማሪ የነዳጅ ማጠራቀሚያ ገንዳዎችን የመገንባት ስራ፣ የፈሳሽ የተፈጥሮ ጋዝ  ማከማቻ ተቋማት ግንባታ እና የነባሩን የባህር መርከቦች ማረፊያ የማስፋፋት ስራዎች ይገኙበታል።

የኢኖክ ዋና ስራ አስፈጻሚ አቶ ሁሴን ሱልጣን ሉታ ፕሮጀክቶቹ ለሁለቱም ኩባንያዎች ለጅቡቲ እና ለኢትዮጵያ ኢኮኖሚ ያላቸውን ከፍተኛ ፋይዳ በማብራራት አጋርነቱ ሁሉንም ተጠቃሚ የሚያደርግ  መሆኑን አስረድተዋል።


አቶ ሁሴን ሱልጣን ሉታ ፕሮጀክቶቹን እውን ለማድረግ ያላቸውን ቁርጠኝነት በመግለጽ ከጅቡቲ መንግስት ከፍተኛ አመራሮች አስፈላጊውን ድጋፍ እንዲደረግላቸው ጠይቀዋል።

ሚኒስትሩ ዶ/ር ጃማ መሀመድ ሀሰን በበኩላቸው የፕሮጀክቶቹን ሂደትና የጥናት ሰነዶችን እንዲቀርቡላቸው ጠይቀው መንግስታቸው የፕሮጀክቶቹን ስኬት ለመደገፍ ዝግጁ መሆኑን አረጋግጠዋል።


ውይይቱን በጋራ የመሩት ሁለቱ ወገኖች በፕሮጀክቶቹ ላይ ተመሳሳይ አቋም ላይ በመድረስ የያዙትን ግብ ለማሳካት በጋራ ለመስራት መስማማታቸው ታውቋል።

ኤሚሬትስ ናሽናል ኦይል ካምፓኒ (ENOC) ቀመጫውን በዱባይ የተባበሩት አረብ ኤምሬትስ ያደረገ በዱባይ መንግስት ባለቤትነት ስር የሚተዳደር ግዙፍ የነዳጅ ዘይትና ጋዝ ኩባንያ ሲሆን በነዳጅ ፍለጋና ምርት፣ በማጣራት፣ በነዳጅ ማከማቻ፣ በችርቻሮ ንግድ፣ እንዲሁም በነዳጅ ማጓጓዣ ዘርፎች በሰፊው የተሰማራ ነው።


በተጨማሪም በበርካታ የዓለም ሀገራት የንግድ ስራዎቹን የሚያከናውን ሲሆን ለኢነርጂ፣ ለኢንዱስትሪ እና ለተለያዩ የንግድ ተቋማት የነዳጅ እና የጋዝ ምርቶችን ያቀርባል።