በመዲናዋ የቀበሌ ቤቶችን በሕንጻዎች የመተካት አዲስ ስትራቴጂ ይፋ ተደረገ

የአዲስ አበባ ከተማ አስተዳደር የከተማዋን የመሬት አጠቃቀም በዘላቂነት ለማዘመን ሰፋፊ ግቢ ያላቸውና ስልታዊ ቦታ ላይ የሚገኙ የቀበሌ ቤቶችን በባለ አራት፣ አምስት እና ከዚያ በላይ ወለል ዘመናዊ የጋራ መኖሪያ ቤቶች የመተካት ስትራቴጂ ይፋ አድርጓል።


የከተማዋ ከንቲባ አዳነች አቤቤ ከመላው የከተማው አመራር ጋር ባደረጉት የምክክር መድረክ ይህ አዲስ አሰራር የ90 ቀናት የክረምት እቅድ ዋነኛ አካል መሆኑን አረጋግጠዋል።

በምክክር መድረኩ ላይ እንደተገለጸው የቆየው የቀበሌ ቤቶችን በቆርቆሮና በቀለም በመጠገን የቁጥር ማብዛት አካሄድ በይፋ ይቆማል።


ከንቲባ አዳነች አቤቤ እንዳስገነዘቡት የከተማዋን መሬት በአግባቡ ለመጠቀም ሰፋፊ ግቢ ያላቸውና ስልታዊ ቦታ ላይ የሚገኙ የመንግስት ይዞታዎች ተለይተው በምትኩ አነስተኛ ቦታ ላይ በርካታ የህብረተሰብ ክፍል ሊስተናገድባቸው የሚችል ባለከፍታ ሕንጻዎች ይገነባሉ።


መንግስት አዳዲስ ቦታዎችን ፍለጋ ከፍተኛ የካሳ ወጪ እየከፈለ ከመገንባት ይልቅ ያሉትን ሰፋፊ የቀበሌ ቦታዎች በዘመናዊ የጋራ መኖሪያ ቤቶች መተካት ይገባል ያሉት ከንቲባዋ የመንግስትን ተጨማሪ ወጪ የሚቀንስና መሬትን በአግባቡ ለመጠቀም የሚያስችል አማራጭ ነው ብለዋል።


ይህ ስትራቴጂ ነባር ነዋሪዎችን በማፈናቀል ሳይሆን በቦታው ላይ ዘመናዊ ባለከፍታ ሕንጻዎችን በመገንባት ነባር ነዋሪዎችን ጨምሮ ተጨማሪ የህብረተሰብ ክፍሎች ተጠቃሚ እንዲሆኑ የሚያደርግ ነው።

መንግስት የደሃውን ቤት ጓዳ አይቶ የሚያጎርስ እንጂ ነዋሪዎችን በዘፈቀደ የሚያፈናቅል አይደለም ያሉት ከንቲባዋ የቀበሌ ቤቶች ባሉበት ቦታ አዳዲስ ቤቶች ሲገነቡ ነባር ነዋሪዎች ቅድሚያ ተጠቃሚ እንደሚሆኑ እና ይህ አሰራር በ90 ቀናት እቅድ ውስጥ ተካቶ በልዩ ንቅናቄ እንደሚፈጸም አቅጣጫ አስቀምጠዋል።


በተጨማሪም የከተማ አስተዳደሩ ሰፋፊ ግቢ ያላቸውን ቦታዎች ለጥገና ሳይሆን ዘላቂና የማይፈርሱ ቤቶችን ለመገንባት እንዲውሉ መመሪያ አስተላልፏል።

ከቤት ልማቱ ጋር በተያያዘ የቀበሌ ቤቶችን በህገ-ወጥ መንገድ የያዙ አካላት ላይ የሚወሰደው እርምጃ በጥንቃቄ እንደሚመራ ከንቲባ አዳነች አቤቤ አስታውቀዋል።


በዚህ ረገድ ህገ-ወጥ የተባሉ ይዞታዎችን ለመለየት የሚያስችል መመሪያ እንደሚወርድ የተገለጸ ሲሆን አመራሩ በስሜታዊነት ወይም ያለ በቂ መረጃ ዜጎችን ከቤት ማስወጣት እንደሌለበት እና አሰራሩ በግልጽነትና በፍትሃዊነት እንዲመራ ተጠቁሟል።  


እንዲሁም አመራሮች የቀበሌ ቤቶችን መረጃ በካርታና በቦታ በመለየት ለከተማ አስተዳደሩ ማቅረብ እንዳለባቸው ታዟል።

ከቤት ልማቱ በተጨማሪ ከተማዋ በከፍተኛ ወጪ እያካሄደችው ካለው የ "ትራንስፎርሜሽን" ስራ በኋላ በክረምት ወቅት የሚከሰት የጎርፍ አደጋ የከተማዋን ገጽታ እንዲያበላሽ እንደማይፈቀድ ከንቲባዋ አስገንዝበዋል።

በክረምት ወራት 175 ሺህ አዳዲስ የሥራ ዕድሎችን ለመፍጠር በኢንዱስትሪ፣ በግብርናና በበጎ ፈቃድ ዘርፎች ላይ ትኩረት ተደርጎ ይሰራል የተባለም ሲሆን የገቢ መሰረትን ለማስፋትና የግብር አሰባሰብ ስርአቱን ለማዘመን፣ በርካታ የመሬትና የንግድ አገልግሎቶች ወደ ዲጂታል ማዕከል እንዲገቡ እንደሚደረግም ተገልጿል።

በተጨማሪም የታቀዱት ስራዎች ተፈጻሚነት በየደረጃው በሚገኘው የክፍለ ከተማ አመራር ትከሻ ላይ እንደሚወድቅና አፈጻጸሙም በየጊዜው በዝርዝር እንደሚገመገም በመድረኩ ተገልጿል።